អ្នកចេះលួចចូលគណនី គេម្នាក់ៗមិនមែនជាអ្នកដែលជំនាញធម្មតាៗនោះទេ ពួកគាត់ពិតជាមានចំណេះដឹងខ្លះណាស់ដែរ ហើយចំពោះ ហេគឃឺ (Hacker) ក៏មិនមែនសុទ្ធតែអាក្រក់ទាំងអស់ដែរ។ ហេគឃឺមួយចំនួន ជួយសង្គមជាតិ ជួយបង្ហាញវិធីការពារដល់យើង និងមួយចំនួនទៀត មានគំនិតផ្សេងៗ។ ទោះជាយ៉ាងណាក្តី យើងត្រូវការពារសុវត្ថិភាពគណនី របស់យើងឲ្យបានល្អទើបជាការប្រសើរ។
១. ពាក្យសម្ងាត់ខ្លាំង និងផ្លាស់ប្តូរពាក្យសម្ងាត់ញឹកញាប់ ៖
ពាក្យសម្ងាត់របស់អ្នក ដែលប្រើសម្រាប់ប្លក់ករគឺត្រូវលាយឡំជាមួយតួអក្សរ និមិត្តសញ្ញានានា លេខច្រើនខ្ទង់ជាដើម និងមិនត្រូវបើចំហ ឲ្យគេដឹង អ៊ីម៉ែល (Email) ឬអាយឌី (ID) របស់ប្លក់យើងឡើយ។ មួយទៀត គឺលោកអ្នកអាចផ្លាស់ប្តូរពាក្យសម្ងាត់ជារៀងរាល់ ៣ខែម្តង ឬអាច៦ខែម្តង។ ការធ្វើបែបនេះ អាចជួយឲ្យគណនីរបស់យើងកាន់តែមានសុវត្ថិភាពរឹងមាំ។
២. មានគណនីគ្រប់គ្រងប្លក់ច្រើនជាងមួយ ៖
អ្នកគប្បីត្រូវប្រើអ៊ីម៉ែល (Email) សម្រាប់គ្រប់គ្រងប្លក់លើសពី១ ដើម្បីជួយការពារនៅពេលដែលមានគេជ្រៀតចូលគណនីរបស់យើង នោះយើងនឹងអាចសង្គ្រោះវាបានទាន់ពេល។ ហើយបើសម្រាប់បទពិសោធន៍ខ្ញុំវិញ គឺខ្ញុំមិនដែលប្រើគណនីសម្រាប់ប្លក់ករ ទៅប្រកាសអត្ថបទឡើយ ព្រោះអាចឲ្យគេងាយចូលស្វែងរកអ៊ីម៉ែលរបស់យើង។ :D (នេះគ្រាន់តែជាគំនិតខ្ញុំ)
៣. ដំឡើងកម្មវិធីដើម្បីឲ្យមានការបញ្ជូនដំណឹងបន្ទាន់ ៖
នៅផ្នែកនេះ គឺចង់ឲ្យយើងចេះភ្ជាប់គណនីរបស់យើង ទៅជាមួយនឹង លេខទូរស័ព្ទ ឬសេវាបម្រើផ្សេងៗ ដើម្បីឲ្យគេបញ្ជូនដំណឹង មកកាន់យើងនៅពេលមានការប្រែប្រួលផ្នែកណាមួយនោះ នៅក្នុងប្លក់កររបស់យើង ដូចជាមានការលុបកូដផ្សេងៗជាដើម។
៤. បម្រុងប្រយ័ត្ន និងពិនិត្យទៅលើស្បែក (Template) ប្លក់កររបស់អ្នក ៖
មុនដំបូងអ្នកគួរតែចេះទាញយកស្បែក (Template) ទុកក្រែងថ្ងៃណាមួយមានបញ្ហាកើតឡើង។ ហើយផ្នែកមួយទៀត អ្នកគប្បីត្រូវពិនិត្យទៅលើ ស្បែកប្លុកករដែលបានពីការទាញយកឲ្យបានត្រឹមត្រូវព្រោះនៅក្នុង នោះអាចមានមេរោគ ឬអាចមានកូដណាមួយ ដែលធ្វើឲ្យប្លុកកររបស់យើងងាយរងគ្រោះពីការលួចគណនី។ ចំពោះមេរោគវិញ បើគ្មានគេ ហែក (Hack) ក៏អាចត្រូវក្រុមហ៊ុន Google បិទប្លុករបស់អ្នកចោលដែរ ព្រោះដើម្បីចៀសវាងពីមេរោគ។
៥. បម្រុងទុក (Back up) ទិន្នន័យប្លុកកររបស់អ្នកយូរៗម្តង ៖
នៅក្នុងប្លក់ករ មានមុខងារមួយដែលយើងអាចទាញយកទិន្នន័យក្នុងប្លក់របស់យើងមក ទុក។ ដូចនេះ វាជាជម្រើសល្អបំផុតសម្រាប់លោកអ្នក ព្រោះថាគ្មានអត្ថបទណាមួយត្រូវបានបាត់បង់ឡើយ នៅពេលដែលគេហែក ហើយចូលទៅលុប ក៏អត្ថបទដែលយើងប្រកាសមិនបាត់បងទៅណាដែរ។ ការធ្វើបែបនេះ មិនមែនធ្វើគ្រប់ពេល រាល់ពេលនោះទេ គឺជារៀងរាល់ ៥ ប្រកាសម្តង ឬ១០ ប្រកាសម្តង។
៦. មិនសរសេររិះគន់ ឬប្រមាថទៅលើហេគឃឺ (Hacker) ៖
ក្នុងចំណុចទី៦ នេះខ្ញុំជាអ្នកបន្ថែមទៅលើការសរសេរដោយខ្លួនឯង។ យើងគួរតែដឹងថា ការរិះគន់ទៅលើនរណាម្នាក់ ដោយចំៗ គេអាចនឹងប្តឹងយើង ឬជួលគេហែក យើងលេងៗ។ ម្យ៉ាងទៀត យើងមិនគួរសរសេររិះគន់ធ្វើឲ្យ ហេគឃឺ គេមានចិត្តស្អប់យើងនោះទេ ព្រោះនេះជាការប្រឈម។
* នេះជាការសរសេរររបស់ខ្ញុំ ដែលខ្ញុំបកប្រែបន្តិចបន្តួចពី គេហទំព័របរទេស ដើម្បីចែកជូនគ្នាដឹង និងដើម្បីជនជាតិខ្មែរយើង ចេះការពារប្លុករបស់ខ្លួន ពីការជ្រៀតចូលនេះ ការលួចគណនី។